Ons het nog baie om voor dankbaar te wees
Dit is nou al meer as twintig maande dat die wêreld met die pandemie worstel en dit lyk of die einde glad nie in sig is nie. Almal se lewens het verander, en baie het in totale wanhoop verval. Ons hoor gereeld van mense wat alles verloor het, en gevolglik ook van selfmoordsake. Die gereelde berigte van Covid-19 siektes en sterftes ontmoedig ons. Tog word ons daagliks daaraan herinner dat ons tydens en ten spyte van die pandemie en die nasleep daarvan nog baie het om voor dankbaar te wees. Ja, dit is slegte tye waarin ons leef, maar daagliks word ons ook herinner aan God se genade en Sy alomteenwoordigheid. Ons weet ook dat geen hare van ons kop verwyder sal word sonder Sy medewete nie. Dit bring vertroosting in moeilike tye…
In hierdie moeilike tye word dit belangrik dat ons aanhou vashou aan ons geloof, en dit is presies waar ek vir ‘n baie lang tyd klaaglik misluk het. Vir jare soek ek na die waarheid rondom geloof; en hoe ek met geen twyfel by my kan aanhou glo dat Hy sal voorsien in wat ek van Hom gevra het nie. Na jare se soektog het ek uiteindelik my antwoord in Matteus 28: 18–20 gevind, en sedertdien is die druk van my skouers af en voel ek baie ligter. en bly glo sonder twyfel in my gedagtes dat Hy sal voorsien vir wat ek van Hom gevra het.
Ek verwys na die gedeelte waar Jesus aan die dissipels verduidelik dat alle mag in die hemel en op aarde aan Hom gegee is:
“Jesus het nader gekom en vir hulle gesê: Aan My is alle mag gegee in die hemel en op aarde. Gaan dan heen, maak dissipels van al die nasies, en doop hulle in die Naam van die Vader en die Seun en die Heilige Gees. en leer hulle om alles te onderhou wat Ek julle beveel het. En onthou, Ek is met julle al die dae tot aan die voleinding van die wêreld.”
Baie lesers sien dalk nie in hierdie Bybelverse die verband tussen geloof en wat Jesus aan sy dissipels geopenbaar het nie, maar vir my was dit ‘n “gloeilamp”-oomblik. Vir die eerste keer het ek verstaan dat geloof en bediening regtig niks met my te doen het nie. Alle mag om die wêreld te verander is immers aan Jesus alleen gegee, nie aan ons nie. Die krag en vermoë om te glo en te bedien lê nie by die mens nie, maar by Jesus. Ek het bloot die vermoë en voorreg om alles wat nodig is in dankbaarheid te ontvang, om uit te gaan na al die nasies (of waar jou roeping ook al lê) en te vertrou dat Hy Sy wil deur my sal uitvoer. So, my geloofsekerheid is nie meer in die uitkoms nie, want hoe kan ek weet wat gaan gebeur? Nee, my sekerheid sit nou in Jesus se teenwoordigheid by my om Sy wil uit te voer. Om so te glo is maklik! En sedertdien doen ek daagliks wat Hy van my verwag, en die res laat ek aan Hom oor!
My werk by FEBA het my ook geleer om al my vertroue in Hom te plaas en nie op my eie vermoë staat te maak nie. Die missie is om na al die nasies te gaan, en dit is waar FEBA die verskil maak en ‘n impak het. FEBA is ‘n lid van FEBC (Far East Broadcasting Corporation International). FEBC kommunikeer in meer as 50 lande, in 130 verskillende tale vir meer as 3 000 uur per dag. Ons gebruik radio-uitsendings en verskeie tegnologiese hulpmiddels om die Goeie Nuus oor te dra. Die meer as 10 miljoen direkte terugvoer per jaar is ‘n bewys dat ons suksesvol is in die uitvoering van ons missie.
Ten spyte van die pyn en lyding rondom ons, is daar steeds baie stof vir dankbaarheid en waardering. Dit is nou lente, met al die pragtige prag wat daarmee gepaard gaan. By FEBA ontvang ons gereeld pragtige getuienisse waar ons radio en internet bedieninge vrugte dra en kosbare siele wen vir Sy koninkryk, een siel op ‘n slag. Die duisende terugvoer wat ons elke jaar van regoor die wêreld ontvang, bemagtig ons en inspireer ons om aan te hou doen wat ons doen. Dit versterk ook ons geloof en herinner ons daaraan dat ons net op Hom kan vertrou, en alles sal regkom. Hy het al die mag – in die hemel en op aarde. En dit is waaroor dit gaan…
Sterkte met al die uitdagings en ek sien uit na ons volgende besoek.
Dr Jurie Vermeulen
Nasionale Direkteur: FEBA
Terugvoerhoogtepunte van FEBC-luisteraars
Ons ontvang elke jaar terugvoer van miljoene luisteraars met inspirerende boodskappe van regoor die wêreld. Ons deel graag van die hoogtepunte:
“Ek luister daagliks na FEBA se uitsendings. Elke program gee my gemoedsrus.”
– luisteraar van Kachenga, Malawi.
“Ek luister al amper 2 jaar na jou program. Dit is ‘n goeie program wat my insigte verbreed, my aanmoedig en help om meer van God te weet.”
– Mnr W Nakhon, Thammarat-provinsie, Thailand.
“Ek luister gereeld na die radiostasie, KanuYah FM Sollo, en het meer kennis opgedoen van wat dit beteken om ’n Christen te wees. Ek weet vir seker watter pad om te volg as ek gered wil word. Ek weet Jesus is die weg en die enigste manier…”
– Broulay, Mali
